Norsk - Franskur Stormsveipur

Íslensk stjórnvöld hafa í kjölfar athyglisverðs sjónvarpsviðtals ráðið konu eina Evu Joly til að rannsaka fúapytt þann sem opnaðist við efnahagshrunið í haust. Kona þessi sem er norsk að ætt en hefur lengi starfað sem rannsóknardómari í Frakklandi. Er vel þekkt fyrir að hafa afhjúpað stór fjármálahneyksli í Evrópu og má þar t.d. nefna; Elf Erap málið í Frakklandi og fótboltahneykslið í Marseille þar sem margir háttsettir menn komu við sögu. Eftir að hún kom hingað hefur hún talað nokkuð tæpitungulaust um hlutina hér. Auðvitað rekur hún strax augun í ýmislegt skrítið. T.d. það hvernig nokkrir tugir manna mynda hér eignartengsl, krosseignartengsl og gott ef ekki eignar krosseignatengsl og nýta svo aðstöðuna til að stela frá þjóðinni, veðsetja hana, koma henni síðan á hausinn og láta almenning borga skaðann. Þessi norsk - franski stormsveipur hristir ærlega upp og hressir við þjóðfélagið. Þó býr manni í grun að Joly hafi ef til vill ekki næga þekkingu á tilurð og skipulagi hinnar kerfislægu spillingar. Sem reyndar er ekkert ný af nálinni. Segja má að þetta nána samkrull efnahagslífs og stjórnmála megi rekja allt til upphaf heimastjórnar árið 1904. Þá þegar mynduðust vísar að stjórnmálaflokkum sem jafnframt voru fyrirgreiðslustofnanir fyrir ákveðna einstaklinga og fyrirtæki. Þessi þróun hélt svo áfram út alla síðustu öld með t.d. kolkrabbanum og smokkfiskinum, tveim viðskiptablokkum sem skiptu með sér auði þjóðarinnar og þar með stjórnmálunum. Þessi fyrirbæri liðu undir lok þegar markaðsþjóðfélag komst hér á við inngönguna í EES. En gömlu tengslin milli viðskipta og stjórnmála og því fór sem fór. Það er vonandi að hinu nýju straumar að utan nái að hreinsa upp þessa fúlu forarvilpu, græðgi, hagsmunapots og sukks á kostnað þjóðarinnar.