Sjónvarp á mannaveiðum

Sjónvarpið hans Palla er komið á mannaveiðar í boði Björgólfs og Landsbankans. Þess sama Björgólfs og útvegaði sér heiðursverðlaun tónlistarmanna á dögunum með því að láta Landsbankann kosta hátíðina. Nú er erfitt að segja til um það hvernig löggan á Íslandi myndi í raun bregðast við ef hún þyrfti að fást við raðmorðingja, þar sem slíkir hafa ekki verið á ferli hér á Íslandi síðan Axla Björn var og hét. En það er annað sem vekur meiri athygli í þessum þáttum en það er landafræðin og þarna virðist ekkert til tökumál að fara í skreppitúr frá Reykjavík og vestur í Búðardal, reyndar er ýjað að því að stúlka sæki vinnu í Reykjavík þaðan. Þessi landafræði kemur að vísu ekki alveg á óvart þegar um Reykvíkinga að ræða því komið hefur fyrir að maður hafi verið boðaður í læknisviðtal til Reykjavíkur frá Akureyri, rétt eins og verið væri að boða mann úr Árbænum eða Breiðholtinu. Ef til vill er þarna ekki um vestmannaeyjinginn að sakast, hann er jú eins og hver annar Palli, einn í heiminum og lætur sig engu um varða þó almenningur gagnrýni launakjör hans eða vilji fá að vita um launakjör Sigrúnar og Þórhalls. Palli ætti að vita það að hann var sjálfur veiddur en hann verður að átta sig á því að það er ekki hlutverk almennings að borga fyrir veiðileyfið á hann né aðra.