Hlaupársdagur

Í dag er hlaupársdagur, þessi dagur sem skítur upp kollinum einu sinni á fjögurra ára fresti. Dagur sem af einhverjum stærðfræðilegum orsökum hefur verið skotið inn í árið til þess að jafna eitthvað. Það hlýtur að vera svolítið skondið að vera fæddur á þessum degi og eiga ekki afmæli nema fjórða hvert ár. En í framkvæmd þá halda víst flestir upp á afmælið þann 28. febrúar þau ár sem ekki eru hlaupaár. Það eru eflaust gild rök fyrir því að þessi dagur kemur fram í enda febrúar á fjögurra ára fresti eins og skrattinn úr sauðarveggnum en þegar allt kemur til alls þá er víst ekki alveg hægt að segja hið sama um tímatalið okkar. Það er að sönnu nokkurn veginn stærðfræðilega rétt reiknað en sagnfræðilega séð er það mun umdeilanlegra. Að mati flestra sagnfræðinga er nú talið að Jesús Kristur hafi fæðst u.þ.b fjórum til fimm árum áður en tímatalið gefur til kynna og þar fyrir utan veit auðvitað enginn hvenær Róm var byggð en við það miðast fæðingarár Krists samkvæmt Biblíunni. Fyrir svo utan þá staðreynd að hann fæddist líklega alls ekki á jólunum og önnur trúarbrögð hafa svo sitt eigið tímatal. Sú hugmynd skaut upp kollinum um þúsaldarmótin að allt mannkyn kæmi sér saman um eitt samræmt tímatal sem t.d. væri miðað við upphaf akuryrkju og þar með siðmenningar fyrir um það bil 10.000 árum. Þótt svo yrði stæði samt ennþá þessi hálfgerði bastarður sem hlaupársdagurinn er.