Myrkur í ljósinu

Oft stendur maður sjálfan sig að því að stilla á Omega þegar mann langar að skemmta sér eða hlusta á einhvern þvætting sem kallaður er kristin trú. Það verður þó að segjast að á aðfangadag var manni ekki skemmt. Þegar stillt var á Omega eftir hádegið þann dag stóð maður í þeirri trú að verið væri að flytja eitthvað uppbyggilegt og fallegt svona í innganginum að jólunum. En nei, á skjánum mátti sjá einhvern karlskrögg vera að dásama Ísraelsríki og úthrópa Palestínumenn, Hamas og Islam, allt í einum graut.

Nú getur það vel verið að gyðingar hafi verið Guðs útvalin þjóð að minnsta kosti hafa þeir sjálfir sagt það. Og þetta hafa þeir reyndar orðið að gjalda dýru verði. Og hitt má deila um hvort að Palestínumenn séu þjóð, það er sagnfræðinga að skera úr um hvort svo hafi verið fyrir 1948 en ekki er hægt um það að deila að Palestínumenn urðu til sem þjóð við ákvörðun Sameinuðu þjóðanna um að skipta Palestínu. Fólk var rekið úr bústöðum sínum þar sem það hafði átt heimili um aldir og því dreift vítt og breitt um heiminn en gyðingum safnað saman á smá blett þar sem sagt er að eitt sinn hafi staðið ríki þeirra, sem síðar var reyndar þurrkað út og gert að nokkrum rómverskum skattlöndum, sem valdalausir smákóngar voru settir yfir.

Við þurfum ekki að rekja söguna lengur, gyðingar sjálfir voru reknir þarna burt eftir uppreisn árið 79 eftir Krist. en einmitt á þeim árum urðu fyrstu kristnu söfnuðirnir til. Jesús Kristur var að sönnu gyðingur og gerði í sjálfu sér ekki sem slíkur uppreisn gegn gyðingatrú þó margt í kenningu hans hafi verið nýbreytni og í raun stangast á við lögmálið. Nokkuð sem reyndar kostaði hann lífið. En eitt er gegnum gangandi  í gegnum alla hans kenningu. Hann barðist hart gegn og gagnrýndi þá sem sífellt voru með trúna á vörunum. Að öllum líkindum hefði hann fordæmt Omega harðlega því það er ekki í samræmi við hugsun hans að grobba sig af eigin kristni heldur sýna hana í verki, hugsun og umburðarlyndi. Því skal hér bætt við að hermenn hins Guðs útvalda ríkis frömdu fyrir nokkrum árum alvarleg helgispjöll þegar þeir drápu fólk sem leitað hafði skjóls í fæðingarkirkjunni í Betlehem. En nú í ár berast þær fréttir að Abbas leiðtogi Palestínu hafi verið við miðnæturmessu í hinni sömu fæðingarkirkju í Betlehem. En á Omega skall á myrkur í öllu ljósaflóðinu sem einkennir aðdraganda hinnar kristnu hátíðar.